虎頭蛇尾

青年社團的工作無聲無色的落幕, 伴侶笑我做人有頭無尾, 選的時候大聲夾惡, 走的時候連年度報告也不去作交待。 我苦笑, 心想口硬回一句:「我不是馬騮, 自然只有頭沒有尾!」但我知衰, 是自己變了心, 無咗commitment, 做得唔好。 我不想'撤賴', 但正如段正淳對他愛過的女人一樣, 我對每件做過的事也曾經投入過。之前做學生輔導, 很投入, 覺得自己'成長咗', 幫到人; 後尾覺得輔導好假, 根本係以'助人自助'逃避介入求助者的生活, 以那種公式化的慰問來製造假像欺騙求助者, 推佢入火坑。跟著我搞公民教育, 想推動中學生關心社會, 其實我還有這個心。 但卻不幸低估了自己的運氣, 以為自己會踎係間所謂名校做幾年, 自然有時間搞埋社團管理; 點知一個屈尾十過檔綠豆, 忙到無哂朋友之餘還燃燒了我大部份的熱情, 導致連對公民教育工作都有點不起勁。 虎頭蛇尾、有頭無尾是我其中一個最大的缺點。不下一次我遇到困難就會退縮、逃避, 而且還是走得很樣衰果隻。自問呢兩年真係做得唔好, 對唔住當年支持小弟的社員, 唯有講聲對唔住。 ---------------------------------------------- 為著年底的國際高峰會, 最近好似好忙又唔知忙乜咁。 本身今年的議題就和我果飯差好遠, 正所謂大纜都扯唔埋, 點做? 最初以為總部果邊有專家, 何以提供免費即食點子, 咁就實有得 win 啦?! 點知原來係空心老倌, 海軍鬥水兵, 死未? 機構對這個會議的態度令人相當面紅。不想投入太多, 因為事實上根本不大關事, 且發揮到的作用也不會大。但又覺得這個峰會太重要, 所有社團都會參加插旗, 唔插支旗好似好樣衰咁。呢種心態真真要不得! 夠薑咪同人講「我地好'策略性'的, 無用就唔做」囉! 又唔敢, 最後為交差, 樣衰。 呢單嘢, 睇嚟同樣虎頭蛇尾。最慘係扮虎頭攞威....... 無我份; 撐蛇尾俾人捽, 咪係我囉。呢鑊, 我踩屎!