有普!?

是次遊行, 好鍾意壹週刊的"有無普.....選!"的海報。一則色彩搶眼, 二則令人想起阿媽鬧我"你做嘢都無譜gea", 好不生動有趣。有普, 梗係好過無普啦! 有時真難想像若香港無左壹傳媒會變成點。可能競爭無咁劇烈, 娛樂版無咁跨張.......... but who knows, 一日有楊受成呢種人, 你慌無賤嘢睇? 今次壹週、蘋果瞓身為民主, 投入情度好似仲高過民陣......... 睇埋其它報紙的 angle 加社評, 點可能唔動心支持吓壹傳媒? 講開'有無譜', 其實香港人呢種'遊行'真係有個'譜'。一方面即唔會出甚麼亂子, 另一方面則已相當公式化。每次都係差不多的 agenda, 大會唱吓歌, 贊吓台下等候的人'香港人, 你地好叻!', 又或阿李卓仁係咁叫大家忍耐, 佢搞緊 logistics。伴侶因工作關係要幫手做糾察, 無計劃無 briefing 無 communications, 搞廿萬人的遊行你話唔驚就假, 直頭係'離哂大譜'! 香港人, 成日遊行話自己點理性點冷靜, 乖得要死! 幾千人迫係SOGO門口, 可以無人帶得起句有氣勢的口號, 更不要說搞是搞非啦。今次若唔係警方太驚慌, 無封哂條行車線, 肯定連些少的'口角'也沒有。 不過近年集會, 總有些很有創意的props, 好搞鬼。我成日都想諗 d 嘢搞吓, 但一條友做又悶, 懶懶閒又無咗件事。尋日令人最有印象的是一個老伯舉住塊牌, 寫住「哪裏有壓迫, 哪裏就有反抗」, 出自毛語錄呀!!! 師夷以制夷, 高招。毛主席話"人民, 只有人民才可創造歷史", 仲話"敵人都是紙老虎", 真真激勵人心。 家陣補飛諗到兩句口號, 不過就覺得差少少: - 唔俾時間表 因住俾人小 - 我要初戀 更要普選 無計, 無乜創意。anyway, post 呢張相因為呢張相好'蘋果'。點蘋果法? 好明啦'吓嘩'? 圖片來源: 《蘋果日報》