Eat Together

大約一兩年前, 友人帶我到深水埗黃金附近的一間叫"大家食"麵檔午飯, 話又平又抵食云云。一試下果然 okay, 茄蛋牛飯、刀削麵、手攪麵等, 平得嚟又好味。舖面就幾頹, 入面好迫挾, 最後竟然要坐門口。最無厘頭的就是, 門後擺咗個"易拉架", 上面印著個惡形惡相的"彪形大漢", 聽聞是呂姓老闆。當時亦沒有很在意, 只覺得這老板幾搞笑, 個店名已經夠怪, 自己又唔係靚仔仲要印自己個Mug 頭出來, 趕客乎?! 但由於價廉物美, 之後我不時都會幫襯這家"大家食"。不知不覺發現在九龍街頭巷尾, 都發現到呂老板的大頭易拉架: 深水埗、觀塘、佐敦、土瓜灣、旺角。睇嚟阿呂老板個樣, 都唔係咁趕客。 尋晚去旺角逛街, 見旺角花園街又有"大家食"新店, 燈光火猛, 仲鬼咁新淨, 心思思又走入去試吓。嘩! 突然見阿呂老板笑笑口係門口! 呂老闆真人身材高大, 一如其大頭照般剃平頭裝, 但面上就經常掛著親切的笑容, 較其招牌照片友善得多。該分店應該開張不久, 燈箱還在安裝, 呂老闆同老闆娘又拜神又乜咁, d 待應阿姐們就十分好招呼, 小弟見小巴司機呀、商店 sales 呀都嚟買外賣, 看來生意真的越做越好。 呂老闆老闆娘生意擴充得咁好, 打扮仍然相當平實, 老闆都只係開架十萬八萬的 Toyota, 其親民的形象有如七八十年代靠山寨廠起家的老實商人。呂老板, 你係得 gea!! 我實繼續嚟幫襯你, 一於"Eat Together"!!